Azərbaycan millisi Xorvatiya yığması ilə heç-heçə edib

Azərbaycan millisi Xorvatiya yığması ilə heç-heçə edib

Futbol üzrə Azərbaycan millisi AVRO-2020-nin seçmə mərhələsində beşinci oyununu keçirib.

Nikola Yurçeviçin rəhbərlik etdiyi kollektiv Xorvatiya yığmasını qəbul edib.

Yurçeviç 3 gün öncə Kardiffdə 1:2 hesabı ilə uduzduqları qarşılaşma ilə müqayisədə start heyətinə 2 dəyişiklik edib. Qapıda Səlahət Ağayevi Emil Balayev, orta xətdə isə Riçard Almeydanı Cavid Hüseynov əvəzləyib. Xorvatiyanın baş məşqçisi Zlatko Daliç isə sentyabrın 6-da Slovakiyanı səfərdə 4 cavabsız qolla məğlub etdikləri görüşdə meydana buraxdığı "11-liy"ə toxunmayıb.

Beləliklə, komandalar meydana aşağıdakı heyətlərlə başlayıblar:

Azərbaycan: 12. Emil Balayev, 2. Qara Qarayev, 3. Şəhriyar Rəhimov, 5. Maksim Medvedev (k), 6. Bəhlul Mustafazadə, 10. Mahir Emreli, 11. Ramil Şeydayev, 13. Dmitri Nazarov, 18.Anton Krivotsyuk, 21. Pavel Paşayev. 22. Cavid Hüseynov

Xorvatiya: 1. Dominik Livakoviç, 3. Borna Barişiç, 4. İvan Perişiç, 6. Deyan Lovren, 10. Luka Modriç (k), 11. Marselo Brozoviç, 13. Nikola Vlasiç, 18. Ante Rebiç, 20. Bruno Petkoviç, 21. Domaqoy Vida, 22. Karlo Bartolets

Oyuna hücumlarla başlayan qonaqlar artıq 6-cı dəqiqədə hesabı açmağa yaxın olublar. Modriçin zərbəsindən sonra müdafiəçiyə dəyib istiqamətin dəyişsə də, Balayev əla reaksiya ilə qola mane olub. Ancaq Xorvatiya yığmasının kapitanı 5 dəqiqə sonra istəyinə çatıb. İspaniya "Real Madrid"nin yarımmüdafiəçisi Krivotsyukun əllə oynamasından sonra təyin edilən penaltini dəqiq yerinə yetirib.

Buraxılan qoldan sonra oyunda nisbətən tarazılıq yaranıb. Əks-hücumlara bel bağlayan Azərbaycan millisi irəlidə Şeydayevin timsalında rəqib qapısında təhlükə yaratmağa çalışıb. Bu hücumlardan ən təhlükəlisi 32-ci dəqiqəyə təsadüf edib. 22 yaşlı forvardın sağdan iti bucaq altında vurduğu topu rəqib qapıçı dəf edib. İlk yarının son dəqiqəsində Qarayevin ara ötürməsindən sonra qapıçı ilə üz-üzə qalan Nazarov topu tora yollasa da, ofsayd qeydə alınıb.

Yurçeviç fasilədə Paşayevi 19 nömrəli Təmkin Xəlilzadə ilə əvəzləyib. Belədə, Medvedev müdafiənin mərkəzində sağına keçib. Oyuna yeni qoşulan "Sabah"ın futbolçusu ilk hissənin əvvəlində qol vurmağa yaxın olub. Lakin onun Şeydayevlə divar ötürməsindən sonra vurduğu top rəqib müdafiəçiyə dəyərək yandan keçib.

Baş məşqçi 60-cı dəqiqədə Hüseynovun yerinə meydana 8 nömrəli Emin Mahmudovu buraxıb.

Bundan bir qədər sonra Krivotsyuk və cəzalı duruma düşüblər. Müvafiq olaraq 62-ci və 66-cı dəqiqələrdə sarı vərəqə görən yığma üzvləri limiti doldurduqları üçün oktyabrın 13-də Macarıstan kollektivi ilə səfər görüşünü buraxacaqlar.

Vərəqələrin ardınca isə qol gəlib. Xəlilzadə sol cinahdan əla keçidini möhtəşəm zərbə ilə tamamlayıb - 1:1. Bir qədər sonra Azərbaycan millisi önə keçməyə yaxın olub. Gəl ki, Xəlilzadə zərbə vurmaq əvəzinə qeyri-dəqiq ötürmə verib.

90-cı dəqiqədə Nazarovu 14 nömrəli Rəşad Eyubov əvəzləyib.

Beləliklə, oyun heç-heçə başa çatıb və Azərbaycan millisi seçmə mərhələdə ilk xalını sonuncu dünya çempionatının finalçısı ilə görüşdə qazanıb.

Qeyd edək ki, yığma komanda bunadək səfərdə Xorvatiyaya 1:2, evdə Macarıstana 1:3, Slovakiyaya 1:5, üç gün öncə isə Kardiffdə Uelsə 1:2 hesabı ilə uduzub.

Digər xəbərlər
Dünən

Bütün xəbərlər

Siyasət

Mir Şahinin vaxtı

İqtisadiyyat

Sosial

Real İntervyu

İdman

Çox Oxunanlar

Mədəniyyət

Real TV Sosial Şəbəkələrdə